सिरहा । सिरहामा ड्युटीमा खटिएका सशस्त्र प्रहरी सहायक निरीक्षक (असई) लक्ष्मणप्रसाद यादवलाई ज्यान मार्ने उद्देश्यले गाडीले ठक्कर दिई फरार भएका संगठित अपराधका मुख्य प्रतिवादी २२ महिनापछि पक्राउ परेका छन् ।
पक्राउ पर्नेमा भारत बिहार राज्यको मधुबनी जिल्ला मधवनी थाना ललमनियाँ गाउँ घोडामोहनाका ३७ वर्षीय मोहम्मद कुर्बान मंसुरी रहेका छन् । उनी घटनामा प्रयोग भएको टाटा सफारी गाडीका धनी तथा चालकसमेत रहेको प्रहरीले जनाएको छ ।
जिल्ला प्रहरी कार्यालय सिरहाका अनुसार बरियारपट्टी गाउँपालिका–२ कचनारीस्थित नेपाल–भारत सीमाक्षेत्र नजिकबाट भारततर्फ ठूलो मात्रामा मदिरा तस्करी भइरहेको गोप्य सूचना पाएपछि प्रहरीले २०८१ माघ १६ गते बिहान करिब ३ बजे टाटा सफारी गाडी रोकेर जाँच गर्न खोजेको थियो ।
प्रहरीका अनुसार जाँचका क्रममा गाडीमा सवार व्यक्तिहरूले ड्युटीमा रहेका असई यादवलाई ज्यान मार्ने उद्देश्यले गाडीले ठक्कर दिएका थिए । घटनापछि गाडीमा सवार व्यक्तिहरू फरार भएका थिए । घटनापछि प्रहरीले उनीहरूविरुद्ध संगठित अपराध तथा ज्यान मार्ने प्रयाससम्बन्धी कसुरमा अनुसन्धान अघि बढाएको थियो ।
लामो समयदेखि फरार रहेका प्रतिवादीमध्ये मुख्य अभियुक्त मंसुरीलाई प्रहरीले २२ महिनापछि नियन्त्रणमा लिन सफल भएको जिल्ला प्रहरी कार्यालय सिरहाका प्रहरी प्रवक्ता डीएसपी रमेशबहादुर पालले जानकारी दिए ।
उनका अनुसार २०८३ भदौ ३ गते साँझ करिब ७ः१० बजे बरियारपट्टी गाउँपालिका–१ कचनारीस्थित नेपाल–भारत सीमाक्षेत्र नजिक मंसुरीलाई नियन्त्रणमा लिन प्रहरी टोली पुगेको थियो । सो क्रममा मंसुरीसहित तीन जनाले प्रहरी टोलीलाई लक्षित गरी एक राउन्ड गोली चलाएको प्रहरीको दाबी छ ।
प्रहरीमाथि फायर भएपछि जवाफी कारबाही गरिएको डीएसपी पालले बताए । त्यस क्रममा प्रहरीले तीन राउन्ड गोली चलाएको थियो । प्रहरीको जवाफी फायरिङमा मंसुरीको बायाँ हातको कुहिना र दाहिने खुट्टाको घुँडामा गोली लागेको प्रहरीले जनाएको छ ।
गोली लागेर घाइते भएका मंसुरीलाई प्रहरीले नियन्त्रणमा लिई तत्काल उपचारका लागि प्रादेशिक अस्पताल सिरहामा भर्ना गरेको छ । उनको उपचार भइरहेको प्रहरीले जनाएको छ ।
प्रहरीका अनुसार घटनामा संलग्न अन्य व्यक्तिहरूको समेत खोजी भइरहेको छ । सीमा क्षेत्रमा हुने मदिरा तथा अन्य अवैध वस्तुको तस्करी नियन्त्रणका क्रममा प्रहरीमाथि नै आक्रमण भएको घटनालाई प्रहरीले गम्भीर रूपमा लिएको जनाएको छ ।
२२ महिनासम्म फरार रहेका मुख्य अभियुक्त मंसुरी पक्राउ परेपछि घटनाको थप अनुसन्धान अघि बढाइएको जिल्ला प्रहरी कार्यालय सिरहाले जनाएको छ । घटनामा प्रयोग भएको हतियार, तस्करीमा संलग्न अन्य व्यक्ति तथा उनीहरूको भूमिकाबारे समेत अनुसन्धान भइरहेको प्रहरीले जनाएको छ ।
